Vazir ustamasi uchun o‘tkazilgan testdan norozilar nima qilishi kerak?

Savol

Vazir jamg‘armasi imtihonidan noroziman. Chunki test darajasi bilan 100 daqiqa vaqt bir-biriga teskari proporsional. Spetsifikatsiyaga ham rioya qilinmagan.

Matematika faniga boshqa imtihonlarga murakkablik darajasi inobatga olinib, ko‘proq vaqt berilardi. Lekin vazirlik unday qilmadi. 

Men davlat imtihonlarining birortasida ham 80 balldan past natija olmaganman. Testni qayta tashkillashtirib, darajasi va vaqtiga hamda spetsifikatsiyaga rioya qilgan holda o‘tkazishlari uchun nima qilish kerak?

Javob

Joriy yil 25-fevral kuni Respublikamiz bo‘ylab Vazir jamg‘armasi hisobidan har oylik ustama olish uchun test sinovlari bo‘lib o‘tdi.

Ba’zi o‘qituvchilar test sinovlari vaqtini belgilashda fanlarning murakkablik darajasi inobatga olinmagan desa, ba’zilari testlar o‘ta murakkab tuzilganligi haqida bizga murojaat yo‘llamoqda.

Ayrim pedagoglarimiz esa testlar ham, saralash bosqichlari ham risoladagidek o‘tganini ta’kidlamoqda. Shuningdek, Maktabgacha va maktab ta’limi vazirligining rasmiy sahifalarida ham 100 ballik natijani qayd etgan pedagoglar haqida ma’lumotlar berib borilmoqda.

Shu sababli, test jarayoni qanchalik xolis va adolatli o‘tganligiga baho berish biroz mushkul masala. Shuning uchun bu masalani faqatgina qonuniy yo‘llar orqali hal etish eng to‘g‘ri yo‘l hisoblanadi.

Ma’lumki, Maktabgacha va maktab ta’limi vazirining tegishli buyrug‘i bilan Vazir jamg‘armasi hisobidan har oylik ustama to‘lanadigan malakali pedagog kadrlarning respublika bo‘yicha cheklangan soni va nomzodlarni saralash bo‘yicha reglament tasdiqlangan.

Mazkur reglamentning 9-bobiga ko‘ra vazir ustamasi uchun o‘tkazilgan test sinovlaridan norizo bo‘lgan pedagoglar 1-bosqich test natijalari e’lon qilingandan so‘ng besh ish kunida test topshiriqlari natijasi bo‘yicha pedagog.uzedu.uz platformasi orqali shaxsiy kabinetdan apellyatsiya shikoyati yuborishi kerak bo‘ladi. 

Bunda test topshiriqlari bo‘yicha nomzod pedagog kadrlar apellyatsiyasi Ixtisoslashtirilgan ta’lim muassasalari agentligi huzuridagi Pedagogik mahorat  va xalqaro baholash ilmiy-amaliy markazi tomonidan ko‘rib chiqiladi va nomzodlarning shaxsiy kabinetiga javob yuboriladi.

Agar apellyatsiya komissiyasi pedagogning shikoyatini yetarlicha qanoatlantirmasa, u holda pedagog xodim Ma’muriy sudga da’vo arizasi kiritishi mumkin.