Oʻqituvchilar malakasini oshirish uchun grantlar ajratiladi

O‘zbekiston hamda Italiya o‘rtasida maktabgacha ta’lim, o‘qituvchi va o‘quvchilar almashinuvi hamda olimpiadalar bo‘yicha yangi kelishuvlarga erishildi.

Maktabgacha va maktab ta’limi vaziri Hilola Umarova boshchiligidagi delegatsiya Italiyada bo‘ldi. Dastur doirasida vazir Hilola Umarova “Perudjia” chet elliklar universiteti rektori, professor Valerio De Chezaris bilan ham uchrashdi.

Unda maktabgacha va maktab ta’limi sohasida hamkorlik o‘rnatish, tajriba almashish, ta’lim va ijtimoiy sohalarda qo‘shma loyihalarni amalga oshirish haqida soʻz bordi.

Muhokama davomida xorijiy tashkilot tomonidan oʻqituvchilar malakasini oshirish uchun grant mablagʻlari ajratilishi boʻyicha kelishuvga erishildi.

Shundan so‘ng, Italiya xalqaro tashkiloti hamjamiyati (SIOI) prezidenti Rikardo Sessa bilan istiqboldagi hamkorlik masalalari muhokama qilindi. Uchrashuv so‘nggida vazirlik va tashkilot o‘rtasida hamkorlik yuzasidan kelishuv imzolandi.

Unga ko‘ra, endi iqtidorli yoshlar ushbu tashkilot bilan hamkorlikdagi almashinuv dasturlarida ishtirok etishadi.

“Global Hippo Association” tashkiloti prezidenti Daniyele Piachenti bilan o‘tkazilgan uchrashuvda tashkilot tomonidan o‘tkazilib kelinayotgan ingliz tili olimpiadasiga MDH mamlakatlaridan talabgorlarni saralash bosqichini joriy yil O‘zbekistonda o‘tkazishga kelishildi.

Shuningdek, vazir Hilola Umarovaning Italiya Respublikasi Ta’lim va e’tiroflar vaziri Djuzeppe Valditara bilan bo‘lib o‘tgan uchrashuvida quyidagi masalalar muhokama qilindi:

• ikki mamlakat o‘rtasida maktabgacha va maktab ta’limi sohasida hamkorlikni yanada rivojlantirish;
  
  

• tajriba almashish hamda qo‘shma loyihalarni amalga oshirish;
  
  

• o‘qituvchilar malakasini oshirish va qayta tayyorlash;
  
  

• maktablarda sun’iy intellektni joriy etish;
  
  

• o‘quvchilarni kasbga tayyorlash va yangi o‘quv dasturlarini yaratish bo‘yicha hamkorlik istiqbollarini muhokama qildilar.
  
  

Mazkur uchrashuvda Italiya tomoni malakali mutaxassislarni O‘zbekistonga yuborish, italyan tili mutaxassislarini tayyorlash va o‘quvchilar almashinuvini yo‘lga qo‘yishga tayyor ekanliklarini bildirishdi.