Sharoiti og‘ir bo‘lgan maktab hojatxonalari binoning ichida joylashtiriladi

Ma’lumki, maktablardagi suv ta’minoti, sanitariya sharoitlari va gigiyena bilan bog‘liq vaziyat o‘quvchilarning salomatligi va davomatiga sezilarli ta’sir ko‘rsatadi.

Masalan, maktablarda sanitariya sharoitlari yo‘qligi sabab, har 14 ta qizdan bir nafari ma’lum bir davrda maktabga bormasligi ma’lum bo‘lgan. Kambag‘al oilalarda esa bu ko‘rsatkich bundan ham yuqori bo‘lib, har 8 tadan birini tashkil etadi.

Bugun Prezident Shavkat Mirziyoyev raisligida o‘tkazilgan videoselektorda yuqumli kasalliklarning 35-40 foizi oddiy gigiyena qoidalariga rioya qilmaslik oqibatida yuzaga kelayotgani ko‘rsatib o‘tildi.

Shu munosabat bilan endilikda barcha maktab, bog‘cha, texnikum, oliygoh, poliklinika va shifoxonalarda “Toza qo‘llar” dasturi amalga oshiriladi. 

Unga ko‘ra:

• ta’lim va tibbiyot tashkilotlaridagi qo‘l yuvish joylari sanitar-gigiyena vositalari bilan to‘liq ta’minlanadi, 

• sharoiti og‘ir bo‘lgan 126 ta maktabda hojatxonalar binoni ichida joylashtirilib, yangidan quriladi, 6 mingdan ziyod bog‘chaga geliokollektor olib beriladi;

• 4 ming 295 ta ijtimoiy muassasada suv baki va sisterna o‘rnatiladi.

Ushbu maqsadlar uchun shu yilning o‘zida byudjetdan 780 milliard so‘m ajratiladi. Har bir ijtimoiy soha muassasasi toza, ozoda bo‘lishi, unda odamlar uchun qulay sanitar-gigiyena sharoiti yaratilishi shartligi qayd etildi.