Ta’lim vazirisiz 15 kun

Bugun Maktabgacha va maktab ta’limi vaziri lavozimidan ozod etilganining 15-kuni, ammo haligacha vazir lavozimiga nomzod Oliy Majlis Qonunchilik palatasi tomonidan ma’qullanmadi.

Hozirda vazirning lavozim vazifalarini vaqtincha bajarib turish uning o‘rinbosarlaridan biriga yuklatilgan.

Vazir lavozimi uzoq muddat bo‘sh qolishi mumkinmi?

Qonunchilikda vazir lavozimi qancha muddat davomida bo‘sh turishi mumkinligi haqida aniq norma mavjud emas, yangi nomzod ko‘rib chiqilguniga qadar ushbu lavozim bo‘sh qolishi esa tabiiy jarayondir.

Masalan, mustaqil O‘zbekiston tarixidagi uchinchi Xalq ta’limi vaziri Turopjon Jo‘rayev 2008-yil 26-mart kuni lavozimidan ozod qilinganida ham, ushbu lavozim salkam bir oydan ortiq vaqt mobaynida bo‘sh qolgan.

Shundan so‘ng, 2008-yil 28-aprel kuni yangi nomzod — G‘ayrat Shoumarov ushbu lavozimga tayinlangan.

G‘ayrat Shoumarov hamda uning o‘rnini egallagan vazir Avazjon Marahimovlar lavozimidan ozod qilinganida esa, ushbu lavozim atigi 4 kun davomida bo‘sh qolgan. 

Qolgan vazirlar egallab turgan lavozimidan ozod qilinishi bilanoq, shu kunning o‘zida Xalq ta’limi vazirlari tayinlangan.

Ma’lumot uchun: O‘zbekiston Respublikasi Konstitutsiyasining 94-moddasiga ko‘ra vazir lavozimiga nomzod O‘zbekiston Respublikasi Oliy Majlisi tomonidan ko‘rib chiqilishi uchun prezident tomonidan taqdim etiladi.

Vazir lavozimiga nomzod mas’ul qo‘mita, siyosiy partiyalar fraksiyalari tomonidan dastlabki tarzda ko‘rib chiqilganidan keyin Qonunchilik palatasining majlisida ko‘rib chiqiladi va ma’qullanadi yoki ma’qullanmaydi.

Konstitutsiyaning 109-moddasi hamda Vazirlar Mahkamasi to‘g‘risidagi qonunning 7-moddasiga ko‘ra vazir nomzodi Oliy Majlis Qonunchilik palatasi tomonidan ma’qullagan taqdirda O‘zbekiston Respublikasining Prezidenti tomonidan lavozimga tayinlaydi.

Mavzuga oid boshqa ma’lumotlar bilan tanishish uchun ‘‘Tanaffus’’ podkastining 21-sonini tomosha qiling.