Xorijiy til o‘qituvchilariga B2 sertifikati uchun avgust oyida qo‘shimcha imtihon o‘tkaziladigan bo‘ldi

B2 sertifikati mavjud bo‘lmagan o‘qituvchilarni ishdan bo‘shatish haqidagi ko‘rsatmalardan so‘ng, Maktabgacha va maktab ta’limi vazirligi O‘zbekiston ta’lim va fan xodimlari kasaba uyushmasi Respublika Kengashiga rasmiy javob xati yo‘llagandi.

Unda o‘quvchilarga sifatli ta’lim berilishi va til bilish ko‘nikmalarini lozim darajada egallashlari uchun ularga ta’lim beradigan pedagoglarning bilim darajasi (shu bilan birga til bilish darajasining asosi sifatida tegishli sertifikatga ega bo‘lishi) yetarli bo‘lishini ta’minlash maqsadida chet tili bo‘yicha milliy sertifikat imtihonlarini avgust oyida ham tashkil etish reja qilinayotgani aytilgandi.

Ma’lumotlarga ko‘ra, Bilimni baholash agentligi tomonidan joriy yil sentyabr, oktyabr, noyabr va dekabr oylarida o‘tkazilishi rejalashtirilgan chet tili bo‘yicha milliy sertifikat imtihonlari avgust oyida ham o‘tkazilishi belgilandi.

Navbatdan tashqari tashkil etilayotgan avgust oyidagi imtihonda ingliz, nemis, fransuz tillaridan test sinovlari bo‘lib o‘tadi.

Bunda pedagoglar 15–18-avgust kunlari  my.gov.uz portali orqali onlayn ro‘yxatdan o‘tib, 19-avgust kuni tegishli to‘lovlarni amalga oshirib, 28-avgust kuni imtihonlarda ishtirok etishi mumkin bo‘ladi.

Talabgorlar ro‘yxatdan o‘tishda o‘zlariga qulay hududni tanlab, imtihonda aynan shu hududda ishtirok etishlari mumkin.