Oliygoh bitiruvchilari sifati indeksida ta’lim yo‘nalishi yetakchi uchlikdan joy oldi

Ta’lim sifatini ta’minlash milliy agentligi (NQAAE) tomonidan 2025-yil 1-avgustdan 2026-yil 31-martgacha (8 oy) bo‘lgan davrni qamrab olgan Bitiruvchilar sifati indeksi bo‘yicha dastlabki modellashtirish natijalari e’lon qilindi.

Dastlabki modellashtirish natijalariga ko‘ra, ta’lim yo‘nalishi bitiruvchilari indeksda eng yuqori ko‘rsatkichlardan birini qayd etgan. 114 ta oliy ta’lim tashkilotining 242,6 ming nafar bitiruvchisi bo‘yicha amalga oshirilgan tahlillarga ko‘ra, ta’lim yo‘nalishi 66,7 ball bilan barcha ta’lim yo‘nalishlari orasida ikkinchi o‘rinni egallagan. 

Ushbu ko‘rsatkich faqat matematika va statistika yo‘nalishidan (69,6 ball) ortda qolgan. Uchinchi o‘rinda esa biznes va boshqaruv yo‘nalishi qayd etilgan bo‘lib, uning natijasi 63,9 ballni tashkil etgan.

Dastlabki hisob-kitoblarga ko‘ra, oliy ta’lim muassasalari bitiruvchilarining umumiy bandlik darajasi 75 foizni tashkil etgan. Bitiruvchilarning o‘rtacha oylik ish haqi 5,1 million so‘m, o‘rtacha ishga joylashish muddati esa 2 oy 1 kunni qayd etgan. Shuningdek, bitiruvchilarning 60,1 foizi kamida to‘rt oy davomida barqaror ish bilan ta’minlangan.

Tahlillar ayrim yo‘nalishlarda bitiruvchilarning daromadlari sezilarli darajada yuqori ekanini ham ko‘rsatmoqda. Jumladan, biznes va boshqaruv yo‘nalishi bitiruvchilarining o‘rtacha oylik ish haqi 8,5 million so‘mni, huquq yo‘nalishida 7,3 million so‘mni, axborot-kommunikatsiya texnologiyalari yo‘nalishida esa 6,8 million so‘mni tashkil etgan.

Bitiruvchilar sifati indeksi natijalariga ko‘ra eng yaxshi natija ko‘rsatgan 20 ta oliy ta’lim muassasasi karyera markazi 500 million so‘mdan rag‘batlantiriladi.

Qayd etilishicha, hozirgi natijalar bitiruvchilar faoliyatining 8 oylik kuzatuv davri asosida shakllantirilgan dastlabki modellashtirish hisoblanadi. Yakuniy indeks natijalari esa 12 oylik ma’lumotlar asosida joriy yilning avgust oyida e’lon qilinadi.