Pedagoglar farzandlari uchun 30 foizlik kontrakt chegirmasi: undan qanday foydalanish mumkin?

Ma’lumki, Vazirlar Mahkamasining 2026-yil 17-sentabrdagi 501-sonli qarori bilan pedagogik faoliyat bilan shug‘ullanuvchi ota yoki onaning farzandi bo‘lgan, davlat oliy ta’lim tashkilotiga bazaviy to‘lov-kontrakt asosida talabalikka tavsiya etilgan abituriyent yoki tahsil olayotgan talabalar to‘lov-kontrakt summasi uchun 30 foiz miqdorida chegirma berish tartibi yo‘lga qo‘yilgan.

Biroq, kontrakt.edu.uz axborot tizimida vazirlik va idoralar o‘rtasida ota-onaning pedagogik faoliyatini avtomatik aniqlash bo‘yicha maʼlumotlar bazalarini tizimga integratsiya ishlari olib borilayotganligi bois, arizalar qabul qilinmayotgandi.

Texnik ishlar yakunlanib, 2026-yil 14-oktabrdan boshlab pedagoglar farzandlariga 30 foizlik kontrakt chegirmasi uchun arizalar qabuliga start berildi. Quyida eng muhim savollarga javob beramiz.

Bu chegirmadan kimlar foydalana oladi?

Mazkur imtiyoz Adliya vazirligi tomonidan 2026-yil 9-iyul bilan ro‘yxatdan o‘tkazilgan 3849-raqami qo‘shma qarorda belgilangan Pedagogik faoliyat bilan bogʻliq lavozimlar roʻyxatidagi xodimlarning farzandlariga nisbatan tatbiq etiladi.

Ma’muriy-boshqaruv, texnik va xo‘jalik xodimlari mazkur pedagogik lavozimlar ro‘yxatiga kirmaydi.

Pedagog farzandlarining otasi yoki onasi pedagog toifasidan chiqarilgan taqdirda, keyingi o‘quv yilidan boshlab unga chegirma qo‘llash to‘xtatiladi.

Shuningdek, ushbu chegirmadan davlat oliy ta’lim tashkilotida (xorijiy hamkor oliy ta’lim tashkilotlarining qo‘shma ta’lim dasturlari asosida va fakultetlarida ta’lim olayotgan talabalardan tashqari) bazaviy to‘lov-kontrakt asosida bakalavriat bosqichi kunduzgi ta’lim shakliga talabalikka tavsiya etilgan abituriyent yoki tahsil olayotgan talabalar foydalana oladi.

Pedagogning bir nechta farzandi davlat oliygohlarida to‘lov-kontrakt asosida tahsil olayotgan bo‘lsa, chegirma har bir farzand uchun alohida qo‘llaniladi.

Kimlarga chegirma qo‘llanilmaydi?

Xususiy va xorijiy oliygohlar, ularning filiallari, harbiy oliygohlar, qo‘shimcha va tabaqalashtirilgan kontrakt hamda qo‘shma dasturlarda o‘qiyotgan talabalar uchun mazkur chegirma qo‘llanilmaydi.

Shuningdek, kechki, sirtqi, masofaviy yoki yuqori bosqichlarda, masalan, magistratura, doktoranturada o‘qiyotagan talabalarga ham 30 fozilik chegirma berilmaydi.

Chegirmadan qanday foydalaniladi?

• talaba kontrakt.edu.uz axborot tizimi orqali to‘lov-kontrakt shartnomasini olish bo‘yicha ariza yuboradi;
  
  
• tizim orqali talabaning pedagog farzandi ekanligi elektron tarzda tekshiriladi va tasdiqlanadi;
  
  
• tasdiqlanganidan so‘ng 30 foizlik chegirma qo‘llaniladi;
  
  

• ariza 2 ish kun ichida ko‘rib chiqiladi va chegirma bir o‘quv yili davomida bir marotaba qo‘llaniladi.

Agar kontrakt summasi 100 foiz bo‘lsa:

• 30 foizi — chegirma;
  
  
• 70 foizi — talabaning to‘lovi.

Ya’ni talaba kontraktning to‘liq 100 foizini emas, faqat 70 foizini to‘laydi.

70 foizlik to‘lovni ikki xil usulda amalga oshirish mumkin:

• 1-usul — summani to‘liq to‘lash. Talaba chegirmadan keyingi 70 foizlik summani bir martada to‘laydi.

• 2-usul — bo‘lib-bo‘lib to‘lash.
  
  

1-bosqich: 25 foiz

• 1-kursga tavsiya etilganlar uchun — 15-oktyabrgacha;
  
  
• 2-kurs va undan yuqori bosqich talabalari uchun — 1-oktyabrgacha belgilangandi.

2-bosqich: yana 25 foiz — 1-yanvargacha. Shunda jami to‘lov 50 foizni tashkil qiladi.

3-bosqich: qolgan 20 foiz — 1-martgacha. Shunda jami to‘lov 70 foizga yetadi.

Qolgan 30 foiz nima bo‘ladi?

Kontrakt summasining chegirmaga to‘g‘ri keluvchi 30 foizlik qismi Davlat budjeti mablag‘lari hisobidan 1-maygacha oliy ta’lim tashkilotiga qoplab beriladi.

Kontraktn to‘lovini to‘liq to‘lab qo‘yganlar nima qiladi?

Bu vaziyatda ham chegirmadan foydalanish mumkin. Bunda mazkur chegirma keyingi yilning kontrakt to‘lovlari uchun amal qiladi. Ya’ni, bu yil 30 foiz chegirma ariza topshiriladi, shunda keyingi yilgi chegirma miqdori umumiy hisobda 60 foizni tashkil etadi. Natijada keyingi yil kontrakt summasini 60 foiz kamroq to‘lash mumkin bo‘ladi.

Ha, albatta. Agar siz kontrakt to‘lovini oldindan to‘liq yoki qisman to‘lagan bo‘lsangiz ham, 30 foizlik chegirmadan foydalanishingiz mumkin. Kontrakt pulining avval to‘langani ushbu chegirmani qo‘llashga to‘sqinlik qilmaydi.

Ariza berishdan oldin joriy o‘quv yili uchun kontrakt shartnomasi bo‘lishi kerakmi?

Ha, ariza berishdan oldin talaba yoki abituriyent uchun joriy o‘quv yiliga rasmiylashtirilgan to‘lov-kontrakt shartnomasi bo‘lishi kerak. Ya’ni, 30 foizlik chegirmani olish uchun tegishli o‘quv yiliga mo‘ljallangan kontrakt shartnomasi rasmiylashtirilgan bo‘lishi talab etiladi.

Yarim grant, yarim kontrakt asosida o‘qiyotganlarga ham chegirma beriladimi?

Ha, yarim grant, yarim kontrakt asosida tahsil olayotgan talabalarga ham 30 foizlik chegirma beriladi.

Super-kontrakt asosida o‘qiyotganlar chegirma oladimi?

501-son qaror bilan tasdiqlangan Nizomga muvofiq, 30 foizlik chegirma bazaviy to‘lov-kontrakt asosida, bakalavriatning kunduzgi ta’lim shaklida tahsil olayotgan tegishli talabalar uchun belgilangan. Shuning uchun super-kontrakt asosida o‘qiyotgan talabalarga ushbu imtiyoz tatbiq etilmaydi.

Ariza qancha muddatda ko‘rib chiqiladi?

Ariza oliy ta’lim tashkilotining registrator ofisi yoki to‘lov-kontrakt shartnomalarini rasmiylashtirishga mas’ul bo‘linmasi tomonidan ikki ish kuni ichida ko‘rib chiqiladi. 

Agar ariza Nizom talablariga muvofiq bo‘lsa, tegishli shartnoma shakllantiriladi. Ariza rad etilgan taqdirda esa arizachiga rad etish sabablari ko‘rsatiladi.

Agarda mening shartnomam stipendiyali bo‘lsa, shu shartnoma summasining 30 foiziga chegirma beriladimi?

Agar talaba stipendiyali to‘lov-kontrakt asosida tahsil olayotgan bo‘lsa, 30 foizlik chegirma stipendiyasiz to‘lov-kontrakt summasidan kelib chiqib hisoblanadi. Bunda maxsus axborot tizimi stipendiyasiz kontrakt summasini avtomatik ravishda hisoblaydi va aynan shu summaning 30 foizi davlat tomonidan qoplab beriladi.

Ariza qabul qilingach, shartnoma summasi o‘zgaradimi?

Chegirma qo‘llanilganda to‘lov-kontrakt shartnomasining umumiy summasi o‘zgarmaydi, ammo shartnomaning tegishli bandlariga o‘zgartirish kiritiladi. 

Unga ko‘ra, shartnoma summasining 70 foizi talaba tomonidan to‘lanadi, qolgan 30 foizi esa O‘zbekiston Respublikasi Davlat byudjeti mablag‘lari hisobidan qoplab beriladi.

Ariza tasdiqlansa, pul darhol OTM hisobiga tushadimi?

Ariza tasdiqlanganidan keyin mablag‘lar oliy ta’lim tashkiloti hisob raqamiga darhol o‘tkazilmaydi. Oliy ta’lim tashkilotlari pedagoglarning farzandlari ro‘yxatini har yili 10-aprelga qadar Ta’lim va ilm-fan vazirligiga taqdim etadi. Mablag‘larni ajratish esa har yili 1-mayga qadar amalga oshiriladi.

Ariza topshirishning oxirgi muddati qachon?

Nizomga muvofiq, oliy ta’lim tashkilotlari pedagoglarning farzandlari ro‘yxatini har o‘quv yilining 10-apreliga qadar shakllantirishi belgilangan.

Bir o‘quv yilida necha marta ariza berish mumkin? Rad etilsa, qayta yuborish mumkinmi?

Chegirma bir o‘quv yili davomida pedagogning bir nafar farzandi uchun bir marta qo‘llaniladi. Agar ariza rad etilsa, rad etish sabablari ko‘rsatilgan bo‘ladi. Ushbu kamchiliklar bartaraf etilgandan so‘ng arizani qayta yuborish mumkin.

Pedagogik faoliyat bilan bog‘liq lavozimlar ro‘yxatini qayerdan tekshirish mumkin?

Pedagogik faoliyat bilan bog‘liq lavozimlarning tasdiqlangan ro‘yxati bilan O‘zbekiston Respublikasi Maktabgacha va maktab ta’limi vazirligi hamda Oliy ta’lim, fan va innovatsiyalar vazirligining 2026-yil 9-iyunda davlat ro‘yxatidan o‘tkazilgan, 3849-sonli qarori orqali tanishish mumkin.

Ota-onadan biri pedagog, biri shifokor bo‘lsa, ham subsidiya, ham chegirma olish mumkinmi?

Ma’lumki, Vazirlar Mahkamasining 2026-yil 12-iyundagi 310-son qaroriga ko‘ra, davlat tibbiyot muassasalarida kamida 15 yil ish stajiga ega bo‘lgan tibbiyot va farmatsevtika xodimlarining farzandlari uchun oliy ta’limning yillik kontrakt summasining 30 foizi qoplab beriladi. Bunda subsidiya miqdori bazaviy hisoblash miqdorining 15 baravaridan oshmasligi belgilangan.

Ushbu vaziyatda ikkita imtizyodan ham foydalanish mumkin. Masalan, talabaning otasi pedagog, onasi 15 yillik stajga ega va davlat tibbiyot muassasasida ishlaydigan shifokor bo‘lsa yoki aksincha. Bunda:

• talaba davlat oliygohida kunduzgi bakalavriatda o‘qishi lozim;
  
  
• tibbiyot xodimlari farzandlari uchun subsidiyaga arizalar shifokor ota yoki ona tomonidan beriladi;
  
  
• pedagoglar farzandlari uchun 30% chegirmaga arizalar talabalarning o‘zi tomonidan kontrakt.edu.uz platformasi orqali beriladi.
  
  Mavzuda oid boshqa savollaringizni izohlarda yozib qoldirishingiz mumkin.