“OpenBudget” tugamaguncha o‘qituvchida halovat yo‘qmi?

10:40 / 28.03.2024 1.72k

Yaqinda “OpenBudget” loyihasining navbatdagi mavsumi boshlangandi. Bu safar ovoz yig‘ish jarayonlari shiddat bilan ketmoqda.

Ammo ayrim hududlarda pedagog xodimlar ovoz yig‘ish ishlariga majburan jalb qilinayotganligi haqidagi xabarlar tez-tez ijtimoiy tarmoqlarda tarqalib turibdi.

“OpenBudget” loyihasining o‘tgan yilgi mavsumida ham o‘qituvchilarga ushbu loyihada ovoz yig‘ish uchun majburiy topshiriq berilayotgani, topshiriqni bajarishga beeʼtibor qarayotgan o‘qituvchilarga kerakli chora ko‘rish bilan tahdid qilinayotganligi to‘g‘risida xabarlar tarqalgandi.

Shundan so‘ng vazir Hilola Umarova “OpenBudget”da o‘qituvchilar majburiy tarzda ovoz yig‘ishga jalb qilinish holatini jiddiy o‘rganyotganini aytib, vaziyatni nazorat ostiga olgandi.

“Ijtimoiy tarmoqlar orqali joylarda ba’zi o‘qituvchilarga ushbu loyihada ovoz yig‘ish uchun majburiy topshiriq berilayotgani, topshiriqni bajarishga bee’tibor qarayotgan o‘qituvchilarga kerakli chora ko‘rish bilan tahdid qilinayotganligi to‘g‘risida xabarlar tarqalib, ular Maktabgacha va maktab ta’limi vazirligi tomonidan jiddiy o‘rganilmoqda” - degandi vazir H.Umarova

Bu yildan boshlab ochiq byudjet jarayonlariga “bir fuqaro – bir ovoz” tamoyilini joriy qilingach, ovozlar narxi ham ancha “qimmatlashgan”. Masalan, ayrim joylarda 10 ta ovozga qo‘zichoq, 50 taga buzoqcha, 100 taga ot, 1000 tasiga mashina va’da qilinmoqda.

Bu esa pedagoglar orasida pul yig‘ish, ayrim hollarda esa maktabdagi darsi qolib ovoz yig‘ishga jalb qilinishiga sabab bo‘lishi mumkin.

Aslida “OpenBudget” loyihasini ko‘pchilik qo‘llab-quvvatlamagan. Chunki, ijtimoiy obyektlarni hukumat o‘zi shundoq ham ta’mirlab, jihozlab berishi kerak. Bu uning funksional vazifasi.

Xo‘sh, pedagoglarning o‘zi “OpenBudget” loyihasidan rozimi? Marhamat, izohlarda o‘z fikringizni yozib qoldiring.

Izoh qoldirish