“Tabiiy fan”, “Tarbiya”, “Informatika” fanlaridan dars beradigan pedagoglarga malaka toifasiga mos ravishda haq to‘lanadi

Ma’lumki, juda ko‘p hollarda “Tabiiy fan”, “Tarbiya”, “Informatika va axborot texnologiyalari” fanlaridan dars beradigan pedagog kadrlarning malaka toifalarini belgilashda turli xil tushunmovchiliklar uchrab turadi.

Shu sababli, mazkur qoidalarni turlicha talqin qilishning oldini olish maqsadida Maktabgacha va maktab ta’limi vazirligining 2024-yil 27-may kungi 168-sonli buyrug‘i imzolangan.

Mazkur buyruqda quyidagilar qayd etilgan:

“Boshlang‘ich ta’lim” o‘qituvchilari boshlang‘ich sinflarda “Tabiiy fan (Science)”, “Tarbiya” va “Informatika va axborot texnologiyalari” fanlaridan;

“Geografiya”, “Biologiya” va “Fizika” fanlari o‘qituvchilari 5-6-sinflarda “Tabiiy fan (Science)” fanlaridan;

“Tarix”, “Milliy istiqlol g‘oyasi va huquq” mutaxassisligiga ega o‘qituvchilar 5-11-sinflarda “Tarbiya” fani bo‘yicha dars o‘tishlariga ruxsat berilgan.

Bunda:

“Tabiiy fan (Science)”dan dars beradigan “Boshlang‘ich ta’lim”, “Geografiya”, “Biologiya” va “Fizika” fanlari o‘qituvchilariga amaldagi malaka toifasiga mos ravishda;

5-11-sinflarda “Tarbiya” fanidan dars beradigan “Tarix”, “Milliy istiqlol g‘oyasi va huquq” mutaxassisligiga ega o‘qituvchilarga “Tarbiya” fanidan malaka toifasi bo‘lmagan hollarda amaldagi malaka toifasiga mos ravishda haq to‘lanadi.

“Tarbiya” fanidan dars o‘tish huquqiga ega bo‘lgan o‘qituvchilarda bir vaqtning o‘zida “Tarbiya” hamda tegishli fanlardan malaka toifalari bo‘lsa, bunda “Tarbiya” fanidan dars berganda faqatgina ushbu fan bo‘yicha malaka toifasi tatbiq etiladi va mos ravishda haq to‘lab beriladi.