O‘qituvchi darsini qisqartirib, maktabga yana yangi xodimni ishga olish to‘g‘rimi?

Savol

Maktabda qo‘shimcha ish o‘rni yo‘q bo‘lishiga qaramay, o‘qituvchining dars soatlarini kamaytirish hisobiga yana yangi xodim ishga qabul qilinishi to‘g‘rimi?

Javob

O‘qituvchining tarif stavkasi ― o‘qituvchiga biriktirilgan dars soatlari asosida bir stavka uchun belgilangan bazaviy tarif stavkadan kelib chiqib aniqlanadigan miqdor hisoblanadi.

Mehnat kodeksining 186-moddasiga ko‘ra, mehnat shartnomasi taraflarining kelishuviga ko‘ra xodimga ishga qabul qilish chog‘ida va keyinchalik to‘liqsiz ish vaqti belgilanishi mumkin.

Ya’ni, maktabda dars yetarli bo‘lmaganligi sababli o‘qituvchilarga 0.25, 0.50 yoki 0.75 stavka ish miqdori belgilanishi mumkin. Ammo ushbu stavkalar xodimning roziligisiz kamaytirilishi mumkin emas.

Maktabda vakant ish o‘rni yo‘qligiga qaramay, yangi xodimni ishga qabul qilish orqali o‘qituvchining tarif stavkasini kamaytirish mehnat shartlarini o‘zgartirish hisoblanadi.

Mehnat kodeksining 135-moddasiga ko‘ra, mehnat shartlari mehnat shartnomasi taraflaridan birining talabiga ko‘ra o‘zgartirilishi mumkin emas.

Mazkur holat mehnat va mehnatni muhofaza qilish to‘g‘risidagi qonun hujjatlarini buzish deb baholanadi. 

Bu esa ish beruvchiga Ma’muriy javobgarlik to‘g‘risidagi kodeksning 49-moddasida nazarda tutilgan norma bo‘yicha bazaviy hisoblash miqdorining 5 baravaridan 10 baravarigacha miqdorda jarima solishga sabab bo‘ladi.

Eslatma: “Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida”gi Nizomning 15-bandidagi ko‘rsatkichlar ketma-ketligi asosida ustunlikka ega bo‘lgan o‘qituvchilarga dars soatlarining maksimal miqdorlari belgilanishi ham mumkin.