Psixolog, kutubxonachi hamda rahbar xodimlar ham vazir ustamasini olishi mumkinmi?

Savol

Hududiy MMTB vazir ustamasiga nomzodlar ro‘yxatini so‘rayotgandi. Bizdan faqat o‘qituvchilar ro‘yxatini olishyapti. Maktabdagi psixolog, kutubxonachi va rahbar xodimlar ham 6 mln so‘mlik vazir ustamasiga da’vogarlik qilsa bo‘ladimi?

Javob

Vazirlar Mahkamasining 2022-yil 2-avgustdagi 425-son qarori bilan tasdiqlangan “Vazir jamg‘armasi to‘g‘risida”gi nizomga ko‘ra, jamg‘arma mablag‘lari hisobidan beriladigan mukofot pullariga psixolog, kutubxonachi va rahbar xodimlar ham da’vogarlik qilishlari mumkin. Faqat ularga ustama emas, bir martalik mukofot puli beriladi.

Buning uchun ular ilg‘or xodimlar toifasiga kirishlari kerak. Ilg‘or xodimlar — bu maktab ta’limi tizimida faoliyat yuritayotgan, ta’lim sifatini oshirishga o‘z hissasini qo‘shgan rahbar kadrlar, psixologlar va kutubxonachilar hisoblanbadi.

Ushbu mukofot pulini berish tartibi qanday?

Rahbar kadrlar, psixologlar va kutubxonachilarga beriladigan bir martalik pul mukofotini olish uchun hech qanday saralash bosqichlari mavjud emas.

Shuningdek, psixolog, kutubxonachi va rahbar xodimlarning ro‘yxatini ham hududiy kengashlar tomonidan (mahalliy hokimlik va MMTB bo‘limlari) shakllantirilmaydi.

Chunki, “Vazir jamg‘armasi to‘g‘risida”gi nizomning 10-bandiga ko‘ra ilg‘or xodimlar hisoblangan rahbar xodimlar, psixologlar va kutubxonachilar to‘g‘risidagi ma’lumotlar vazirlik huzurida tuzilgan Ishchi guruh tomonidan shakllantiriladi va Maktabgacha va maktab ta’limi vaziriga taqdim etadi.

Shundan so‘ng bir martalik pul mukofotini olish huquqiga ega bo‘lgan rahbar xodimlar, psixologlar va kutubxonachilar ro‘yxati Maktabgacha va maktab ta’limi vaziri tomonidan tasdiqlanadi.

Bir martalik pul mukofoti mehnatga haq to‘lashning eng kam miqdorining 5,5 baravari, ya’ni 6 mln 352 ming 500 so‘m miqdorida to‘lanadi. Bir martalik pul mukofotlari ularni to‘lash bo‘yicha vazirning buyrug‘i chiqqan vaqtdan boshlab bir oy davomida to‘lab beriladi.

Tavsiya: Odatda bir martalik pul mukofotini olish huquqiga ega bo‘lgan rahbar xodimlar, psixologlar va kutubxonachilar Maktabgacha va maktab ta’limi vazirligi huzuridagi Ishchi guruh e’tiboridan chetda qoladi.

Shu sababli, ta’lim sifatini oshirishga o‘z hissasini qo‘shgan psixolog, kutubxonachi hamda rahbar kadrlar ularga vazir  jamg‘armasi hisobidan mukofot puli berilishini so‘rab, Maktabgacha va maktab ta’limi vazirligiga murojaat qilishlari tavsiya qilinadi.

• Vazirlik ishonch telefoni: (71) 202-09-09

• Vazirga murojaat portali: vazir.uzedu.uz