Yana ikki nafar maktab o‘quvchisi ijaraga mashina olib, avtohalokatga uchradi

So‘nggi paytlarda voyaga yetmaganlar tomonidan avtomobil boshqarilishi va ularga transport vositasini ijaraga berilishi kabi holatlar ko‘payib bormoqda.  

Masalan, yaqindagina Namangan viloyatida 16 yoshli maktab o‘quvchisi boshqaruvidagi avtomashina suvga ag‘darilishi natijasida avtomashinada bo‘lgan ona va bola vafot etgandi.

Yana bir maktab o‘quvchisi boshqaruvidagi avtomashina esa 4-sinf o‘quvchisining o‘limiga sabab bo‘lgandi. Samarqandda esa 11-sinfda tahsil oluvchi o‘quvchi Lacetti rusumli avtomobilda YTHga uchrab, vafot etdi. Endi esa yana xuddi shunga o‘xshash holat 8-sinf o‘quvchilari bilan sodir bo‘ldi.

Joriy yilning 15-iyun kuni Yangi Namangan tumanidagi 70-sonli umumiy o‘rta ta’lim maktabining ikki nafar 8-sinf o‘quvchilari Telegram’dagi avtomobillarni ijaraga berish bilan shug‘ullanadigan guruhdan 1 million so‘m evaziga Spark rusumli transport vositasini 8 soatga ijaraga olib, uni boshqarib ketayotgan vaqtida tezlikni me’yordan oshirgani natijasida boshqaruvni yo‘qotib, yo‘l chetidagi beton to‘siqqa borib urildi.

Hodisa oqibatida bolalar turli tan jarohatlari bilan shifoxonaga yotqizilgan. Eng achinarlisi, ushbu bolalar tahsil oladigan maktabda Yo‘l harakati xavfsizligi boshqarmasi tomonidan muhokama yig‘ilishi o‘tkazilgan bo‘lgan.

Bolalarga avtomashinani ijaraga bergan shaxs to‘g‘risida olib borilgan surishtiruv ishlarida uning o‘zi hali haydovchilik guvohnomasiga ega bo‘lmagani, avtomashinani joriy yilning 12-iyun kuni Toshkent shahrida yashovchi fuqarodan sotib olgani ma’lum bo‘ldi.

“120 tezlikda tormozim ishlamay qoldi. 1 mln so‘mni dadamning ishxonasidan oldim. Dadamning bundan xabari bo‘lmadi”, degan YTH paytida mashina boshqaruvida bo‘lgan o‘quvchi.

“Hozirda mana endi biz ota-onalar jabrini tortib o‘tiribmiz, bu yerda. Qancha-qancha ota-onalar Namangan viloyatida xuddi shunday tadbirkorlar orqasidan aziyat chekibdi. Vijdonni sotmasdan, kallani ishlatib, ish qilinglar.

Ota-onalarga jabr qilmanglar, bizga. Biz bularni orqasidan doim poylab yurolmaymiz. Bular telefonda shundoq kanalga kirsa, sizlar taklif qilib tursanglar, ularning telefonini doim tekshirishga bizning qurbimiz yetmaydi, aqlimiz yetmaydi. O‘zimizning ishimiz bor, bola-chaqani boqish bor, ro‘zg‘or bor.

Sizlar arzimagan, oson pul topaman deb, o‘quvchilarga mashinani berasizlar, avariya bo‘lib o‘lib ketgani qancha? Hozir mana shu yerda 15 kundan buyon komada yotgani ham bor ekan, xuddi shunaqa avariya bo‘lib”, deydi YTHga uchragan o‘quvchining otasi.