Attestatsiya vaqtida kompyuter ishlamay qolsa nima qilish kerak?

Savol

Attestatsiyaga kirib, test yechayotganimda kompyuter qotib, platforma ishlamay qoldi. Kompyuterda qotish bo‘lganidan so‘ng men belgilagan javoblarning o‘rni ham almashib ketibdi. Xullas, hammasi rasvo bo‘ldi.

Tashkilotchi va mas’ullarga endi nima qilaman deb so‘rasam, natijangiz shu, shikoyat qilishga haqqingiz yo‘q deb, urishib berishdi. Bu vaziyatda o‘qituvchi nima qilishi kerak? Axir ayb menda emas, ularning o‘zida edi-ku.

Javob

Vazirlar Mahkamasining 2021-yil 17-sentyabrdagi 572-son qarori bilan tasdiqlangan "Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida"gi nizomning 4-bobida apellyatsiya berish tartibi belgilangan.

Unga ko‘ra, attestatsiya natijalaridan norozi bo‘lgan pedagog kadrlar natijalar e’lon qilingan kundan boshlab o‘n kun mobaynida apellyatsiya komissiyasiga yozma ravishda ariza (shikoyat) berishlari kerak bo‘ladi.

Apellyatsiya komissiyasiga murojaat qilish yozma ravishda yoki vazirlikning rasmiy veb-sayti orqali elektron tarzda amalga oshirilishi mumkin.

Bunda ariza (shikoyat) ro‘yxatga olingan kundan boshlab o‘n kun muddatda, qo‘shimcha o‘rganishlar talab etilganda esa malaka toifasi sertifikatlari shakllantirilgunga qadar ko‘rib chiqiladi.

Ariza ko‘rib chiqilgach, o‘quv fani bo‘yicha test yoki malaka sinovlarini o‘tkazish jarayonida tashkiliy-texnik jihatdan kamchiliklar mavjudligi aniqlansa, Maktabgacha va maktab ta’limi vazirligi test sinovlarining qaytadan topshirilishini tashkil etishi lozim bo‘ladi.

Masalan, 2024-yil 15-16-aprel kuni Informatika va axborot texnologiyalari fanidan bo‘lib o‘tgan attestatsiya test sinovlari vaqtida ham pedkadr.uzedu.uz platformasida nosozliklar yuzaga kelib, ishlamay qolganligi sababli, Maktabgacha va maktab ta’limi vazirligi 2024-yilning 22-may kuni aynan shu fandan qayta attestatsiya o‘tkazishga majbur bo‘lgan.

Shu sababli, agar test jarayonida tashkiliy-texnik jihatdan muammolar kuzatilgan bo‘lsa, pedagog xodimlar darhol apellyatsiya komissiyasiga yozma yoki elektron ravishda ariza (shikoyat) berishlari kerak.