O‘quvchi boshqargan avtomobil halokatga uchrab, ikki nafar o‘quvchi vafot etdi

Sirdaryoda uch nafar o‘smir bo‘lgan “Lacetti” zovurga tushib, yonib ketdi. Ularning ikki nafari halok bo‘ldi, yana biri shifoxonaning jonlantirish bo‘limiga yotqizilgan. Avtomobilni 15 yoshli bola otasidan beruxsat haydab ketgan. Bu haqda Sirdaryo viloyati Ichki ishlar boshqarmasi xabar berdi.

Joriy yilning 19-sentyabr kuni soat 22:00lar atrofida Sirdaryo viloyati Sirdaryo tumani Furqat mahallasi hududidan o‘tuvchi mahalliy ahamiyatdagi 20V036 avtomobil yo‘lining “Sholikor-Sirdaryo” yo‘nalishini 1-km/da, 2010 y.t, voyaga yetmagan D.A. otasiga tegishli bo‘lgan “Lasetti” rusumli avtomashinani (otasidan beruxsat) boshqarib ketayotib, yuqori tezlik oqibatida boshqaruvni yo‘qotib, yo‘l chetidagi zovurga tushib ketishi natijasida YTH sodir etgan.

YTH natijasida avtomashina salonida bo‘lgan ikki nafar voyaga yetmagan yo‘lovchilar voqea joyida vafot etgan, haydovchi esa tuman tibbiyot birlashmasining Jonlantirish bo‘limiga yotqizilgan. 

Holat yuzasidan O‘zbekiston Respublikasi Jinoyat Kodeksining 266-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.

Ichki ishlar boshqarmasi barcha ota-onalardan voyaga yetmagan, transport vositasini boshqarish huquqiga ega bo‘lmagan farzandlarini avtomashina boshqarishlariga sharoit yaratib bermasliklarini so‘ragan.