O‘quvchilarni maktab hududini obodonlashtirishga jalb qilgan direktorga 20 mln so‘m jarima solindi

Ma’lum qilinishicha, Bolalar ombudsmani kotibiyatiga Toshkent viloyati, Zangiota tumanida istiqomat qiluvchi fuqaro Sh.N ning murojaati kelib tushgan.

Murojaatda Zangiota tumanida joylashgan ta’lim muassasasida  maktab direktori hamda ayrim pedagoglar tomonidan o‘quvchilarni majburiy mehnatga jalb qilish (daraxt oqlash, yer sug‘orish, qor kurash kabi) holatlariga yo‘l qo‘yilganligi bildirilib, mas’ullarga chora ko‘rish so‘ralgan.

Shundan so‘ng, Bolalar ombudsmani so‘rovi asosida mazkur holat Kambag‘allikni qisqartirish va bandlik vazirligining Toshkent viloyati boshqarmasi tomonidan o‘rganilgan.

Olib borilgan o‘rganish natijalariga ko‘ra, o‘quvchilarga go‘yoki tarbiyaviy jazo chorasi deb majburiy mehnatga yo‘l qo‘yilgan. 

Ushbu qonunbuzarlik holati yuzasidan maktab ma’muriyatiga nisbatan MJTK ning 51-moddasi 1-qismi bilan (mehnatga ma’muriy tarzda majburlash) 20 mln 600 ming so‘m miqdorida ma’muriy jarima jazosi qo‘llanilgan.