O‘qituvchilar uchun attestatsiya to‘lovi 50 foizga arzonlashdi

Xabaringiz bor, 2025-yil 15-sentabr kuni Prezident Shavkat Mirziyoyev ta’lim tizimi xodimlari bilan uchrashuv chog‘ida pedagoglarni yanada qo‘llab-quvvatlashga qaratilgan yangi tashabbuslarni ilgari surib, o‘qituvchilarga 8 ta imtiyoz joriy etilishi haqida aytgandi. Ulardan biri pedagoglar uchun davlat xizmatlari to‘lovini 2 karra kamaytirish edi.

Joriy yilning 17-aprel kungi Vazirlar Mahkamasining 175-sonli qarori bilan hukumatning ayrim qarorlariga o‘zgartirish va qo‘shimchalar kiritildi. 

Kiritilgan qo‘shimchalarga ko‘ra, ta’lim tashkilotida mehnat shartnomasi asosida ta’lim va tarbiya sohasida kasbiy faoliyatni amalga oshiruvchi pedagog shaxslar uchun ayrim davlat xizmatlari narxi xizmatlar umumiy  qiymatining 50 foizini tashkil qilishi belgilandi.

Endilikda pedagog kadrlarni navbatdan tashqari attestatsiyadan o‘tkazish bo‘yicha davlat xizmatini ko‘rsatganlik uchun bazaviy hisoblash miqdorining bir baravari miqdorida emas, 50 foizi miqdorida to‘lov qilinadi. 

Hozirgi kunda bazaviy hisoblash miqdori 412 ming so‘mni tashqil qilib, endilikda pedagog xodimlar navbatdan tashqari attestatsiyadan o‘tish uchun 206 ming so‘m miqdordagi to‘lovni amalga oshiradilar.

Undan tashqari pedagog xodimlar uchun quyidagi davlat xizmatlari narxlari ham 50 foizga tushirildi:

• ko‘chmas mulk obyektlarining davlat kadastri sohasida davlat xizmatlari;

• muhandislik-kommunikatsiya tarmoqlariga ulanish bo‘yicha davlat xizmatlari;

• umumta’lim fanlarini bilish darajasini aniqlash va sertifikat berish bo‘yicha davlat xizmatlari;

• traktorchi-mashinist guvohnomasini olish uchun imtihon topshirishga ruxsat berish bo‘yicha davlat xizmatlari;

• rasmiy hujjatlarga apostil qo‘yish bo‘yicha davlat xizmatlari va boshqalar.