Xodimlar Qurbon hayiti bayrami munosabati bilan 19-iyungacha dam oladigan bo'ldi

10:50 / 11.06.2024 4.96k

Prezident Shavkat Mirziyoev “Muborak Qurbon hayitini nishonlash to‘g‘risida”gi qarorni imzoladi. Qurbon hayiti (Iyd al-Adha) bayramining birinchi kuni 16-iyun— yakshanba kuniga to‘g‘ri kelmoqda.

O‘zbekiston Respublikasi Prezidentining 2021-yil 9-fevraldagi PF-6165-son “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida”gi Farmoni 5-bandiga ko‘ra Navro‘z umumxalq bayrami, Mustaqillik kuni va Yangi yil bayrami hamda Ramazon hayiti (Iyd al-Fitr) va Qurbon hayiti (Iyd al-Adha) diniy bayramlarini nishonlash davrida qo‘shimcha va ko‘chirish hisobiga ishlanmaydigan kunlar 3️ kundan kam bo‘lmagan muddatga belgilanadi.

O‘zbekiston Respublikasi Prezidentining 2023-yil 22-dekabrdagi PF-213-son “2024-yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida”gi Farmoniga ko‘ra, barcha xodimlar uchun (ish haftasining turidan qat’i nazar) 2024-yil 18-iyun — seshanba qo‘shimcha dam olish kuni etib belgilangan.

Demak, Qurbon hayitida 6 kunlik ish haftasida ishlaydigan xodimlar ketma-ket 3️ kun (16-,17-, 18-iyun), 5 kunlik ish haftasida ishlaydigan xodimlar esa 4️ kun (15-, 16-, 17-, 18-iyun), ketma-ket dam olishadi. Ya’ni:

15-iyun — shanba, 5 kunlik ish haftasida ishlaydigan xodimlar (hududiy MMTB) uchun dam olish kuni. 6 kunlik ish haftasida ishlaydigan (ta’lim muassasalari) xodimlar uchun esa ish kuni.
16-iyun — yakshanba, Qurbon hayitining birinchi kuni.
17-iyun — dushanba, Qurbon hayitining birinchi kuni yakshanba — dam olish kuniga to‘g‘ri kelishi munosabati bilan ushbu dam olish kuni dushanba kuniga ko‘chiriladi.
18-iyun — seshanba, ish haftasining turidan qat’i nazar barcha xodimlar uchun qo‘shimcha dam olish kuni.
19-iyun — chorshanba, ish haftasining turidan qat’i nazar barcha xodimlar uchun ish kuni.

Diqqat! Ayrim xususiy sektordagi ish beruvchilar bu bizga taalluqli emas, qo‘shimcha dam olish kuni hamma ishga chiqsin deb, g‘ayriqonuniy topshiriq bermoqda. Yuqoridagi holatlar mulkchilik shakllaridan va idoraviy bo‘ysunuvidan qat’i nazar barcha ish beruvchilar, ya’ni sodda qilib aytganda, budjet va xususiy tashkilotlar uchun ham majburiydir.