Ikkinchi marta ham kasbiy sertifikat ololmaganlar taqdiri nima bo‘ladi?

Savol

Stajyor-o‘qituvchiman. Joriy yilning mart-iyun oylarida o‘tkazilgan kasbiy sertifikatlash sinovida ozgina ball yetmay qolgandi. 

Shu sababli, navbatdan tashqari o‘tkazilgan kasbiy sertifikatlash sinovida qatnashgandim. Lekin bu safar ham yetarli ballni to‘play olmadim. Endi kelasi yilgacha ishlab tursam bo‘ladimi?

Javob

Vazirlar Mahkamasining 2024-yil 2-fevraldagi 87-son qarori bilan tasdiqlangan reglamentga ko‘ra, kasbiy sertifikat sinovi natijasi bo‘yicha 56 va undan yuqori ball to‘plagan talabgor nazorat sinovidan o‘tgan hisoblanadi.

56 balldan kam ko‘rsatkichga ega talabgor esa nazorat sinovidan o‘tmagan hisoblanadi va ularga  navbatdan tashqari kasbiy sertifikat sinovlarida qatnashishi uchun yangi o‘quv yili boshlangunga qadar yana bir marta imkoniyat beriladi.

Lekin navbatdan tashqari nazorat sinovida ham ishtirok etib, yetarli ball to‘play olmagan talabgor bilan tuzilgan mehnat shartnomasi mehnat qonunchiligida belgilangan tartibda bekor qilinishi belgilangan.

Bunda ish beruvchi mehnat shartnomasi bekor qilingan talabgor tugatgan oliy ta’lim tashkilotiga talabgorning kasbiy sertifikatlashdan o‘ta olmaganligi to‘g‘risida e’tiroznoma (reklamatsiya) yuboradi.

Xulosa o‘rnida aytadigan bo‘lsak, stajyor-o‘qituvchi ikkinchi marotaba ham kasbiy sertifikat sinovidan o‘tolmagan bo‘lsa, u maktabda ishlay olmaydi.