Al-Xorazmiy olimpiadasi natijalari ustamaga ta’sir qiladimi?

Savol

Yaqinda o‘tkazilgan Аl-Xorazmiy nomidagi tabiiy fanlar (science) olimpiadasidagi o‘quvchilarning natijalari o‘qituvchiga ustama uchun ball berishda hisobga olinadimi? 

Javob

Savolga to‘liq javob berish uchun Аl-Xorazmiy nomidagi aniq va tabiiy fanlar (science) olimpiadasi haqida ham batafsil ma’lumot berib o‘tishni lozim topdik.

Аl-Xorazmiy nomidagi aniq va tabiiy fanlar (science) olimpiadasi matematika hamda tabiiy fanlar (fizika, kimyo, biologiya  jamlangan holda) yo‘nalishida tashkil etilib, 7-8-sinf o‘quvchilari o‘rtasida o‘tkaziladi.

Hozirgi kunda Аl-Xorazmiy nomidagi aniq va tabiiy fanlar (science) olimpiadasi - bu kompleks mahalliy olimpiada shaklida boshlanib, unda tuman (shahar) maktablaridan 7-8-sinf o‘quvchilari qatnashadi.

Ushbu olimpiada jami 5 ta (fizika, kimyo, biologiya, informatika va matematika) fandan tashkil qilinadi. Bunda fizika, kimyo, biologiya fanlari tabiiy fanlar sifatida alohida yo‘nalish qilingan bo‘lib, informatika va matematika fanlari aniq fanlar yo‘nalishi sifatida hududiy hamda viloyat bosqichlari ko‘rinishida o‘tkazib kelinadi.

Faqat shunga parallel ravishda Аl-Xorazmiy nomidagi olimpiadaning aniq fanlar (informatika va matematika) yo‘nalishi xalqaro olimpiadaga aylantirilgan. 

Ya’ni, tabiiy fanlar (fizika, kimyo, biologiya) bo‘yicha olimpiada maktab, tuman (shahar), viloyat va respublika bosqichi bilan yakunlansa, aniq fanlar (informatika va matematika) yo‘nalishi hududiy bosqich yakunlanishi bilan respublika bosqichi o‘tkazilmay, xalqaro olimpiada shaklida o‘tkaziladi.

Demak, Аl-Xorazmiy nomidagi olimpiadaning tabiiy fanlar (science) yo‘nalishi respublika darajasida yakunlanadi, aniq fanlar (informatika va matematika) yo‘nalishi esa xalqaro darajada yakunlanadi.

Mazkur olimpiada natijalari ustama uchun ball berishga asos bo‘ladimi?

Vazirlar Mahkamasining 2019-yil 30-sentabrdagi 823-son qarori bilan tasdiqlangan “Pedagog, psixolog va kutubxona xodimlarining faoliyatini baholash mezonlari”ga ko‘ra, tanlovlar, musobaqalarning tuman (shahar) bosqichida pedagog xodim o‘quvchisining ishtiroki uchun ball berilishi nazarda tutilgan.

Bunda o‘quvchilarning natijalari asosida pedagog xodimga quyidagicha ball beriladi:

• o‘quvchilar tuman (shahar) miqyosidagi tanlov va boshqa tadbirlarda qatnashib, eng quyi g‘olib ko‘rsatkichining 55 foizidan yuqori natijalarni ko‘rsatganda – 10 ball;

• o‘quvchilar tuman (shahar) miqyosidagi tanlov va boshqa tadbirlarda qatnashib, eng quyi g‘olib ko‘rsatkichining 70 foizidan yuqori natijalarni ko‘rsatganda – 20 ball;

• o‘quvchilar tuman (shahar) miqyosidagi tanlov va boshqa tadbirlarda qatnashib, 1-, 2-, 3-o‘rinlarni egallaganda – 30 ball.

Bunda ustama belgilashda inobatga olinadigan fan olimpiadalari, ko‘rik tanlovlar, musobaqalar va tadbirlar ro‘yxati har yili Maktabgacha va maktab ta’limi vazirligi tomonidan tasdiqlanadi.

Ma’lumki, 2024-2025-o‘quv yili uchun umumta’lim muassasalaridagi o‘qituvchilarning bazaviy ta’rif stavkalariga har oylik ustamalar belgilashda inobatga olishga tavsiya etiladigan fan olimpiadalari, ko‘rik tanlovlar, musobaqalar va tadbirlar ro‘yxati Maktabgacha va maktab ta’limi vazirligining 2025-yil 13-yanvardagi 03-14-75-sonli ko‘rsatma xati bilan tasdiqlangan.

Mazkur ro‘yxatda esa Al-Xorazmiy nomidagi xalqaro matematika va informatika olimpiadasi ko‘rsatilgan. Ya’ni, ko‘rib turganimizdek, pedagog xodimlarga ustama tayinlashda faqatgina Al-Xorazmiy nomidagi xalqaro matematika va informatika olimpiadasi natijalari hisobga olinishi nazarda tutilgan.

Аl-Xorazmiy nomidagi aniq va tabiiy fanlar (science) olimpiadasining tabiiy fanlar (fizika, kimyo, biologiya) yo‘nalishida o‘quvchilar natijaga erishgan taqdirda pedagog xodimlarga ustama uchun ball berilmaydi.

Buning uchun o‘quvchilar Аl-Xorazmiy nomidagi aniq va tabiiy fanlar (science) olimpiadasining aniq fanlar (matematika va informatika) yo‘nalishida natijaga erishgan bo‘lishlari kerak.