“Dolzarb 90 kun” tadbirlariga o‘z ixtiyori bilan qatnashgan pedagoglarga bir martalik mukofot puli beriladi

Avvalroq, pedagog va rahbar xodimlar joriy yilda mehnat ta’tiliga chiqmasligi, hatto ular haftaning yakshanba kunlari ham “Dolzarb 90 kun” tadbiri bo‘yicha ishlashlari kerakligi haqida topshiriqlar berilgani haqida xabar bergandik.

Nihoyat, Maktabgacha va maktab ta’limi “Dolzarb 90 kun” tadbirining 14-kunida hududlarda kuzatilayotgan holatlar bo‘yicha rasmiy munosabat bildirdi.

Vazirlikning ta’kidlashicha, pedagoglarning yozgi ta’til davrida mehnat ta’tiliga chiqishi uchun tegishli reja-grafik tasdiqlangan va mazkur rejaga asosan pedagoglarning belgilangan kunlarda mehnat ta’tiliga to‘liq chiqishi ta’minlanadi.

Ushbu tadbirlarga o‘z ixtiyori bilan qatnashgan pedagoglarni bir martalik pul mukofotlari bilan rag‘batlantirish rejalashtirilgan.

“Dolzarb 90 kun” tadbirlariga o‘quvchilarning qatnashishi ham ixtiyoriy bo‘lib, bolalar ota-onalarning roziligi bilan jalb qilinadi.

“Joriy yil tashkil etilayotgan “Dolzarb 90 kun” tadbirlariga Maktabgacha va maktab ta’limi vazirligi tizimidagi 1239 ta umumta’lim maktabida kunduzgi oromgohlar faoliyati yo‘lga qo‘yilgan hamda unga 170 minga yaqin o‘quvchilar ixtiyoriy jalb qilinishi rejalashtirilgan”, - deyiladi vazirlik rasmiy bayonotida.

Ma’lumot uchun: Pedagoglar bu borada belgilangan qonuniy talablar buzilganlik holatiga duch kelsa, shuningdek “Dolzarb 90 kun” tadbirlariga o‘z ixtiyori bilan qatnashgan pedagoglarga bir martalik pul mukofotlari to‘lab berilmagan taqdirda vazirlikning Ishonch telefoni (71-202-09-09)ga murojaat etishi mumkin.