Qaysi o‘qituvchilarning sertifikati dars taqsimotida rol o‘ynaydi?

Savol

Ona tili va adabiyot fani o‘qituvchisi yoki boshqa fan o‘qituvchilari milliy yoki xalqaro sertifikatga ega bo‘lsa, ular dars taqsimoti jarayonida ko‘proq dars olishi mumkinmi?

Javob

Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risidagi nizomning (ro‘yxat raqami 3271, 2020-yil 30-iyun) 15-bandi to‘rtinchi xatboshisida chet tili va STEAM fanlaridan mutaxassisligi bo‘yicha tegishli sertifikatlarga ega o‘qituvchilarga maksimal dars soatlari berilishi qayd etilgan.

Unda quyidagi sertifikatlar nazarda tutilgan:

• TESOL Level 5;

• CEFR B2;

• IELTS 6 va undan yuqori;

• Maktabgacha va maktab ta’limi vazirligi tomonidan belgilanadigan boshqa sertifikatlar.

Ammo bu yerda faqatgina chet tili va STEAM fanlaridan mutaxassisligi bo‘yicha xalqaro sertifikatlarga ega o‘qituvchilar nazarda tutilgan.

Ta’kidlash lozimki, O‘zbekiston Respublikasi Prezidentining “Noshirlik va matbaa sohasini yanada rivojlantirishga oid qo‘shimcha chora-tadbirlar to‘g‘risida” 2020-yil 16-martdagi PQ–4640-son qarorining 13-bandida STEAM fanlari (Science – tabiiy fanlar, Technology – texnologiyalar, Engineering – texnik ijodkorlik, Art – san’at, Mathematics  – matematika) belgilangan.

Yuqoridagilardan kelib chiqib aytadigan bo‘lsak, ‘‘Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida’’gi nizomning 15-bandi to‘rtinchi xatboshisida faqat chet tili va STEAM fanlaridan mutaxassisligi bo‘yicha xalqaro sertifikatlarga ega o‘qituvchilar ko‘rsatilgan.

Shu sababli, ushbu norma  ona tili va adabiyot, shuningdek, boshqa fan o‘qituvchilariga nisbatan ham tatbiq etilmaydi va dars taqsimotida rol o‘ynamaydi.

Ma’lumot uchun: Ushbu maqola Adliya vazirligining tegishli xulosalaridan kelib chiqqan holda tayyorlangan.