Toshkent shahrida 3 yildan buyon maktabga bormay, diniy ta’lim olayotgan o‘quvchi aniqlandi

Toshkent shahrida bolalarga noqonuniy diniy ta’lim berish holati aniqlandi. Bu haqda DXX xabar berdi.

1993-yilda tug‘ilgan shaxs Toshkent shahar, Olmazor tumanining “Jiydali” MFYda vaqtincha istiqomat qilayotgan xonadonda 2025-yilning may oyidan buyon 15 nafar yoshlarga noqonuniy diniy ta’lim berib kelayotgani va buning evaziga har biridan 150 AQSh dollarini olib kelgani aniqlandi. 

Ma’lum bo‘lishicha, respublikaning turli hududlaridan kelgan, diniy ta’lim oluvchilarning 11 nafari voyaga yetmagan bo‘lib, achinarlisi, ular orasida 3 yildan buyon maktabga bormayotgan o‘quvchi ham bor.

Xuddi shu mahallada ijaraga olingan yana bir xonadonda ham poytaxtning Mirzo Ulug‘bek tumanida yashovchi, 1977-yilda tug‘ilgan shaxs joriy yilning iyun oyidan buyon 10 nafar voyaga yetmagan bolalarga noqonuniy diniy ta’lim berib, evaziga har biridan 100 AQSh dollari hamda yegulik uchun oziq-ovqat mahsulotlarini talab qilgan.

Shuningdek, huquq-tartibot organlari tomonidan xonadonda tekshiruvlar o‘tkazilishi ehtimolini hisobga olib, bolalarni yashirish uchun qo‘lbola yerto‘la qurdirgan. Mazkur yerto‘la, ya’ni “quduq” temir qopqoq bilan yopilib, tosh va qum bilan berkitilgan. Bu bilan u bolalarning hayotini qanchalik xavf ostiga qo‘yayotganini hatto o‘ylab ham ko‘rmagan. 

Har ikki holat bo‘yicha mahalla fuqarolar yig‘inida sayyor sud o‘tkazilib, ushbu shaxslar MJtKning 241-moddasi asosida javobgarlikka tortildi.