Attestatsiya bo'yicha apellyatsiyada o‘qituvchilar ishtiroki rasman cheklandi

Ma’lumki, attestatsiya test sinovlarida ishtirok etgan pedagoglar ularning pedagogik mahorati va psixologik tayyorgarligi noto‘g‘ri baholanganligi, o‘quv fani bo‘yicha test yoki malaka sinovi materiallarida xato va kamchiliklar mavjudligi aniqlangan taqdirda apellyatsiya shikoyati berishi mumkin.

Shikoyat arizasi yo‘llagan pedagog xodim arizani aynan uning ishtirokida ko‘rib chiqilishini xohlasa, shikoyat arizasida ‘‘murojaat aynan mening ishtirokimda ko‘rib chiqilsin’’, degan mazmunda qo‘shimcha kiritishi kerak bo‘lardi.

Chunki, Vazirlar Mahkamasining 2021-yil 17-sentabrdagi 572-son qarori bilan tasdiqlangan nizomning 58-bandida murojaat etuvchi pedagog kadrlar apellyatsiya komissiyasi tomonidan murojaati ko‘rib chiqilishi jarayonida bevosita yoki masofadan turib onlayn tarzda ishtirok etishi mumkinligi belgilangandi.

Mazkur tartib hukumatning 2025-yil 26-noyabrdagi VM-740-sonli qarori bilan bekor qilindi. Ya’ni, endilikda apellyatsiya shikoyatlari o‘qituvchilar ishtiroksiz ko‘rib chiqiladi.

Bunda apellyatsiya murojaatini ko‘rib chiqish bo‘yicha ekspertlarning xulosalari ko‘rib chiqish yakunlangan zahoti murojaat etuvchi pedagog kadrning shaxsiy kabinetiga yuboriladi. Murojaat etuvchi pedagog kadrning so‘roviga ko‘ra Apellyatsiya komissiyasi qarorining tegishli qismidan ko‘chirma taqdim etilishi mumkin.

Eslatib o‘tamiz, kuzgi attestatsiya o‘qituvchilar orasida yanada katta norozilikka sabab bo‘lgandi. Avvalroq esa attestatsiya jarayoni bo‘yicha bo‘lib o‘tgan bir nechta sud majlislarida Maktabgacha va maktab ta’limi vazirligi mas’ullariga pedagog kadrlar tomonidan yuborilgan shikoyat arizasi ularning ishtirokisiz ko‘rib chiqilganligi sababli bir necha bor e’tiroz bildirilgandi.