Dars soatining sinf rahbarligiga aloqasi bormi?

Savol

Maktabda mutaxassisligim bo‘yicha 30 soat dars va sinf rahbarlik qilishim mumkinmi? Yoki 30 soat darsi bor o‘qituvchiga sinf rahbarlik berilmaydimi?

Javob

Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risidagi nizomning 15-bandidagi ko‘rsatkichlar ketma-ketligi asosida ustunlikka ega bo‘lgan o‘qituvchilarga dars soatlarining maksimal miqdorlari belgilanishi mumkin.

Maktabgacha va maktab ta’limi vazirining 2023-yil 27-iyundagi 190-sonli buyrug‘i bilan tasdiqlangan "Umumiy o‘rta ta’lim muassasasi sinf rahbarining yo‘riqnomasi"ga ko‘ra sinf rahbari quyidagi mezonlarga asosan tanlab olinadi:

• kamida 3 yillik pedagogik ish stajiga ega bo‘lgan;

• maktabda asosiy ishchi sifatida faoliyat olib borayotgan;

• boshqaruvchanlik qobiliyatiga ega bo‘lgan;

• o‘quvchilar bilan ishlash jarayonida mas’uliyat bilan yondasha oladigan;

• boshlang‘ich sinflarda sinf rahbarligi boshlang‘ich sinfga biriktirilgan o‘qituvchilarga yuklatiladi.

Bunda umumta’lim muassasalarida mehnatni soatbay (shu jumladan o‘rindoshlik) asosda faoliyat olib boruvchi o‘qituvchilarning sinfga rahbarlik qilishiga yo‘l qo‘yilmaydi.

Ko‘rib turganimizdek, sinf rahbarlarini tanlab olish mezonlarida o‘qituvchining dars soatlari miqdori ko‘rsatilmagan.

Ya’ni, sinf rahbarlik qilish uchun pedagog xodimning qancha dars soati olganligi mutlaqo ahamiyatsiz. Xulosa shuki, 30 soat darsi bor o‘qituvchi ham sinf rahbarlik qilishi mumkin.