Maktab o‘qituvchilarga ham milliy sertifikatlarni olish uchun subsidiya beriladimi?

Savol

O‘qituvchilarga milliy sertifikatlarni olish uchun subsidiyalar ajratilishi haqidagi xabarni o‘qigandim. Bu maktab o‘qituvchilariga ham taalluqlimi?

Javob

Joriy yilning 5-fevral kuni O‘zbekiston Respublikasi Prezidentining PQ–49-sonli qarori imzolangan.

Qarorga ko‘ra, 2026-yil 1-iyuldan 2028-yil 1-yanvarga qadar Bandlikka ko‘maklashish davlat jamg‘armasi mablag‘lari hisobidan kasbiy ta’lim sifatini oshirishga yo‘naltirilgan quyidagi turdagi subsidiyalar joriy etilishi belgilangan:

• o‘qituvchi va ishlab chiqarish ta’limi ustalariga xalqaro miqyosda tan olingan kasbiy ta’limga oid sertifikatlar;

• shuningdek, Kambag‘allikni qisqartirish va bandlik vazirligi tomonidan tasdiqlanadigan ro‘yxat asosida milliy sertifikatlarni olish uchun sarflangan mablag‘larning 50 foizi, biroq BHMning 20 baravarigacha oshmagan miqdorda qoplab berilishi nazarda tutilgan.

Ammo bu maktab o‘qituvchilariga tegishli emas

Ma’lumki, O‘zbekiston Respublikasi Prezidentining 2025-yil 23-oktabrdagi PF-190-son Farmoni bilan Kasbiy ta’lim agentligi tashkil etilgan.

Agentlik Oliy ta’lim, fan va innovatsiyalar vazirligi huzuridagi tashkilot bo‘lib, asosan kasbiy ta’lim tashkilotlari, ya’ni texnikumlar faoliyatini muvofiqlashtirish va kasbiy ta’lim sohasini boshqarishga mas’ul hisoblanadi.

Prezidentning PQ–49-sonli qarorida ham, ijtimoiy tarmoqlarda tarqalgan xababrlarda ham aynan kasbiy ta’lim sifatini oshirish haqida so‘z borgan bo‘lib, belgilangan subsidiyalar ham faqat kasbiy ta’lim sohasida faoliyat yurituvchi o‘qituvchi va ishlab chiqarish ta’limi ustalariga beriladi.

Mazkur qarorda Maktabgacha va maktab ta’limi tizimida faoliyat yurituvchi pedagoglar nazarda tutilmagan.