“Dolzarb 90 kunlik” tadbiri uchun pedagoglar yakshanba kuni ham ishga chaqirtirilishi to‘g‘rimi?

Savol

Assalomu alaykum, menda savolim bor edi. Maktab xodimlarini yakshanba kunlari ishlatish haqida qaror chiqqanini aytib, dadamni majburiy tarzda dam olish kuni maktab direktori chaqirib olyapti.

Bu haqdagi qarorni topa olmadim. Iltimos, agar shunday qaror bor bo‘lsa, yubora olasizmi? Umuman olganda, yakshanba kunda ishlashga majbur qilish mehnat shartnomasida aytilmagan bo‘lsa, bu qonunan zid emasmi? 

Maktab ishchilari ham odam, endi maktab tugaganiga dam olamiz deganda ishlatishga haqqi bormi?

Javob

Bunday qaror yo‘q. 2025-yil 15-may kuni Prezident rahbarligida maktab ta’limi tizimidagi islohotlarga bag‘ishlangan videoselektor yig‘ilishi bo‘lib o‘tdi. 

Unda ta’limning barcha bosqichlariga zamonaviy yondashuvlarni joriy etish, yoshlar tarbiyasi va ularning salohiyatini ro‘yobga chiqarish bo‘yicha ustuvor vazifalar belgilab berildi. 

Yig‘ilishda davlat rahbari tomonidan yoshlar bo‘sh vaqtini mazmunli tashkil etishga qaratilgan “Dolzarb 90 kunlik” dasturi e’lon qilingan. 

Bizga kelib tushayotgan ma’lumotlarga ko‘ra, ayni vaqtda hududiy maktabgacha va maktab ta’limi bo‘limlari tomonidan bu yil pedagog va rahbar xodimlar mehnat ta’tiliga chiqmasligi, hatto ular haftaning yakshanba kunlari ham “Dolzarb 90 kun” tadbiri bo‘yicha ishlashi kerakligi haqida tinimsiz topshiriqlar berilmoqda. 

Ammo bu mehnat qonunchiligiga zid

Mehnat kodeksining 209-moddasiga ko‘ra, dam olish kunlarida va ishlanmaydigan bayram kunlarida ishlash taqiqlanadi. 

Mehnat kodeksining 210-moddasiga ko‘ra, dam olish kunlari va ishlanmaydigan bayram kunlari xodimning roziligisiz ishga jalb etishga yo‘l qo‘yilmaydi. (Bundan alohida hollar mustasno)

Xodim dam olish kuni ishlashga o‘zi rozi bo‘lgan taqdirda MK 263-moddasiga ko‘ra, dam olish kunlaridagi yoki ishlanmaydigan bayram kunlaridagi ish uchun kamida ikki hissa miqdorida haq to‘lanishi kerak.

MK 214-moddasiga ko‘ra, ish beruvchi: xodimlarga qonunchilikda kafolatlangan ta’tillar berishi, ta’tillar berish tartibiga rioya etishi shart. Chunki, ish yili tugaguniga qadar maktabdagi barcha xodimlar mehnat ta’tiliga chiqishi shart.

Ma’muriy javobgarlik to‘g‘risidagi kodeksning 49-moddasiga ko‘ra, mansabdor shaxs tomonidan mehnat va mehnatni muhofaza qilish to‘g‘risidagi qonunchilikni buzish, bazaviy hisoblash miqdorining besh baravaridan o‘n baravarigacha  (3 million 750 ming so‘mgacha) miqdorda jarima solishga sabab bo‘ladi.

Agar mehnat huquqlaringiz buzilsa, hududingizdagi mehnat inspeksiyasiga, prokuratura yoki adliya organlariga murojaat qiling. Yoki quyidagi ishonch raqamlariga telefon qiling:

• Kambag‘allikni qisqartirish va bandlik vazirligi  – +99871 200 06 00

• Bosh prokuratura – 1007;

• Adliya vazirligi – 1008;

• O‘zbekiston kasaba uyushmalari – 1092